把握住經濟低潮的時候(時機)買平貨

2008年7月25日的林sir電台訪問，


林sir在最後一集做了個總結：好的投資理念，一定經得起時間洗鍊，又分享了廿年前的一個訪問，實行借古論今。這一篇先post「訪問大結局」。

主持收到一段由聽眾email來的林sir的舊訪問，當時的主持是Ms黃，為80年代香港電台的司儀，與劉家傑拍檔，和林sir做了香港第一個金融節目，叫「雄財偉略」，當時好多人上呢個節目，連任志剛都做過嘉賓。黃楚楚利用呢個訪問出了一本書，她好叻，睇好地產豪宅賺了錢，唔洗再做主持，炒樓去了。

從重溫此個20年前的訪問，可以看到林sir的投資理念由20年前至今，基本上都沒有改變。林sir話這套理念來自英國佬，因為當時係學師仔，由師傅教落，佢自己亦親眼見過保險公司如何買匯豐作長線投資，亦見到Templeton如何揀新興市場、揀個好的行業、揀間好的公司，作長線投資。

到林sir做分析員推介股票，都係用同一個方式，睇到當時香港地產好，就買長江同新地囉！林sir俾個價錢大家作參考：89年六四民運，6月4日是星期日，6月5日星期一開市時，港股跌到一仆一碌，長江$6.35，新地$6.5，匯豐(經調整埋送股後)係$6；今時今日，就算跌咗落嚟，呢三間公司股價仍然喺百一、百二蚊，全部升咗20倍(已經無用最高價作比較了)。

主要就是看到個客觀環境同個大氣候，地產係好嘛！銀行業亦係好，匯豐係向外發展係好嘅方向，咁就好簡單好簡單啦！祗是中間一樣波濤洶湧，就算長線都嚇死啦！由89年至今有20年，中間98 年亞洲金融風暴又點呢？林sir又揾三個數字俾大家作參考：亞洲金融風暴最差的時候是1998年8月13日，恆指跌返落去6600點，長江$29，新地$22，匯豐(已調整送股)$50，都高過89年之後嘅好多好多倍。即是話喺89年被震走咗，到下一個低潮都係買唔返呢啲好公司，所以，最重要係公司好。

若果你以為十年前價錢今日可以買得返就係抵買，咁你就錯喇！點解有股票買唔返呢？因為好公司本身是賺多了錢的，她們的資產亦上升了；就算去到亞洲金融風暴的300厘息，地產冧到唔清唔楚，跌了八成，新地跌得多都仍有$22，都係要四倍於六四時的價錢。

所以，經過這20年之後，林sir對自己的一套理念更有信心，唔單祗無變，而係更加強咗！當時推介嗰啲客戶，除了Templeton，在89年六四民運之後，加州公務員退休基金（Calpers）都有透過基金公司嚟投資香港股票，六個幾銀錢買長江，唔係祗買一日，係由89年買到91年，慢慢買，一路買上去，大家都可以睇到架！如果股票返番十年前價錢，好似電盈咁，咁就唔好要喇！

所以，呢套理念係要留意公司如何做生意，而不唔係睇股價。主持請林sir以一句做總結，林sir話佢師傅教佢一句：「You take care of the business，capital will take care of itself。」(即如果你好好照顧這門生意的話，你的本金就自然會上升。)

有人問到底如何賺錢？林sir話把握住經濟低潮的時候(時機)買平貨，等下一個經濟週期時，手上選的公司出現高增長，股價隨著攀升，而非盲目的追隨消息。基本上，總結一向以來，考慮基本因素，是否好公司，低位買貨，然後長線持有。林sir一再強調不要高追，等機會，總之大跌就買，買咗就收埋、鎖埋佢。

最後，林sir希望各位聽眾賺到錢，記緊要回饋社會！！