根據康狄夫循環理論睇香港

工字唔出頭，除八十年代及九十年代初期本港加薪幅度略大於CPI升幅外，由1994年起本港加薪幅度只反映CPI升幅。

過去十四年除非閣下升職，不然你收入扣除通脹並冇增加。報上睇到有讀者問，今年三十歲月入3萬多，手上有100多萬元投資，點樣可以四十歲退休？

如果問我，答案係問者戇居、答者愚蠢！除非打政府工，可以四十五歲時申請退休咬長糧，由1979年至今美元購買力每年失去5%，至今並未停止。

唔好以為每年回報率15%好容易做到，1997年至今恒生指數平均每年只升4%（由16000多點升至23000多點）。

恒指成分股公司全都係全港最一流企業，尚且如此，更何況一般人？

根據康狄夫循環理論，香港已完成三十年高速增長期（1967至97年），進入十年高原期（1997至2007年），2008年香港極有機會進入十五到二十年回落期，經濟回落期，保本亦有一定困難。

至於中國，1978至2008年高速增長期亦完成，正進入十年高原期（2008至2018年），即中國仲有十年炒上落市，香港進入跑輸通脹期。